*

Þriðjudagur, 16. desember 2014 | Þorsteinn Haukur Harðarson | thorsteinn@sport.is | @thorsteinnhauku á Twitter

Fimleikadeild Hattar missir 22 æfingatíma vegna leikja körfuboltaliðsins: „Fimleikadeildin situr uppi með kostnaðinn“

fimlegilsstaðirAuður Vala Gunnarsdóttir, yfirþjálfari hjá Fimleikadeild Hattar á Egilsstöðum, ritaði áhugaverðan pistil á Facebook í gær þar sem fram kemur að fimleikadeildin missi 22 æfingatíma í vetur þar sem leikir körfuknattleiksdeildarinnar séu settir á sama tíma og æfingarnar.

Auður Vala er skiljanlega allt annað en sátt við stöðuna og gaf Sport.is leyfi til að birta færsluna í heild sinni.

Fimleikar – Missa 22 tíma af æfingartímabili sínu.

Elsti hópur fimleikadeildar Hattar sem keppir bæði á íslandsmóti og í deildarkeppni Fimleikasambands Íslands missir 22 tíma af undirbúningstímabili sínu fyrir fyrsta mót vetrarins eða 3 vikur miðað við að sé æft þrisvar sinnum í viku. Í haust ákvað körfuknattleiksdeild Hattar og KKÍ að setja meistaraflokkleiki sína á föstudaga þótt vitað væri að þetta væri æfingartími fimleikadeildar Hattar og tími elstu iðkenda deildarinnar líkt og undanfarin ár. Ekki var haft samráð við forsvarsmenn fimleikadeildarinnar og því búið að raða niður og fast setja tímatöflu vetrarins í fimleikum. Erfitt er að flytja hópa á milli í tímatöflunni þar sem iðkendur telja um 230 talsins og um 30-60 iðkendur á sama tíma og elstu iðkendur sjálfir að þjálfa til að anna öllum þeim sem vilja stunda greinina.

Fyrir komandi keppnishóp er þetta mikill missir þar sem greinin inniheldur þrjár keppnisgreinar og vegna tímaleysis í íþróttahúsi getum við ekki æft eins oft / mikið og önnur félög ásamt því að hafa ekki samsvarandi aðstöðu og þau félög sem við keppum við. Því er þessi tími mjög verðmætur fyrir liðið. Að hafa misst allan þennan tíma veit ég ekki hvort stúlkurnar verða tilbúnar fyrir keppni og sú spurning hefur komið upp hvort við getum farið í keppni.

Fyrir fimleikadeild Hattar hefur þetta mikinn aukakostnað í för þar sem við þurfum að ganga frá öllum salnum og koma svo aftur seint að kvöldi og byggja öll áhöldin aftur fyrir laugardagsmorgun. Þetta telur tæpa 2 tíma. Hver á að greiða þennan kostnað, íþróttafélagið Höttur, Körfuknattleiksdeild Hattar eða KKÍ ? En það er fimleikadeild Hattar sem situr uppi með kostnaðinn.

Mér þætti gaman að sjá hvort öðrum greinum innan Hattar yrði boðin svona framkoma og hvort aðrar deildir væru til í að missa svona mikið af æfingartíma á undirbúningstímabili fyrir komandi keppnistímabil.

Körfuknattleikssambandið hafnaði beiðni sem kom inn frá körfuboltadeild Hattar sem var send inn í nóvember um breytingu á keppnistíma eftir áramót. Þeirri beiðni var hafnað því miður. Til að mynda leikur ÍA fimmtudaga og sunnudaga þar sem fimleikadeild Akranes er með æfingardaga á föstudögum og laugardögum líkt og okkar deild hér á Egilsstöðum.

Ég vona að aðrar íþróttagreinar innan Hattar lendi ekki í þessari aðstöðu líkt og við, þetta er vont og stressandi fyrir unga keppendur sem hafa sett sér markmið og vilja standa sig vel.

Auður Vala Gunnarsdóttir
Yfirþjálfari fimleikadeildar Hattar
Egilsstöðum.